ISAKE Mande Mezi Ijans Kont Ensekirite a

Yon delegasyon Inisyativ Sitwayen Angaje Kont Ensekirite (ISAKE), ki gen senk manm, te rankontre Minis Jistis la, Mesye Carlos Hercule, pou diskite sou ogmantasyon ensekirite a ann Ayiti.

Rankont sa a fèt nan kad efò sitwayen yo ap fè pou sansibilize otorite yo epi jwenn solisyon konkrè pou fè fas ak vyolans k ap devaste peyi a.

Nan mitan diskisyon yo, yo te abòde mezi ijans ak estrateji ki dwe mete anplas pou konbat vyolans gang ame yo, ki ap fè moun viv nan laperèz nan plizyè rejyon nan peyi a. Gwoup kriminèl sa yo ap enpoze lwa pa yo epi paralize lavi chak jou, mete popilasyon an nan kè sote ak ensekirite. ISAKE te fè konnen li mande mezi solid prese prese nan men Leta pou retabli lòd epi pwoteje sitwayen yo.

Òganizasyon an te soulve enpòtans yon mobilizasyon nasyonal pou ranfòse otorite Leta a epi retabli lapè. Pou ISAKE, sèlman yon aksyon kowòdone ak detèmine ka rive kanpe vag vyolans ki ap destabilize peyi a.