Doktè Carl François mennen OFATMA sou chemen modènite

Depi lè Doktè Carl François te pran direksyon Jeneral Ofis Asirans pou Aksidan Travay, Maladi ak Matènite (OFATMA), li pote yon nouvo dinamik nan enstitisyon sa a ki se yon poto mitan nan sistèm pwoteksyon sosyal Ayiti a. Avèk yon vizyon estratejik ak bon jan jesyon, li reyalize gwo refòm estriktirèl ki fè OFATMA pi efikas epi modèn.

Youn nan pi gwo reyalizasyon li yo se deplasman biwo santral OFATMA nan yon bâtiman modèn ki twouve l Tabarre, sou Boulva 15 Oktòb. Bâtiman sa a, ki kouvri 5,000 mèt kare, se yon senbòl renouvèlman ki bay yon espas travay optimal pou anplwaye yo epi amelyore kalite sèvis yo bay asire yo.

Nan domèn afilyasyon yo, rezilta yo remakab tou. Anba direksyon Doktè François, OFATMA rive agrandi rezo li a, jounen jodi a li gen 514 antrepriz prive ak tout enstitisyon piblik yo afilye. Kwasans sa a reflete nan kantite nouvo konpayi prive ki rantre nan pwogram Asirans Maladi ak Matènite a, kote 128 nouvo antrepriz rantre.

Dènyè estatistik yo montre enpak pozitif refòm sa yo: 105,421 asire nan sektè piblik la ansanm ak 180,039 depandan, epi 50,589 asire nan sektè prive a ki gen 26,055 benefisyè endirèk. Chif sa yo montre pwogresyon konstan nan pwoteksyon popilasyon ki kalifye yo.

Yon lòt aspè enpòtan nan jesyon sa a se estabilizasyon finansye enstitisyon an. Ant mwa mas 2022 ak mas 2023, OFATMA reyòganize epi peye dèt ki rive 535,867,836.37 goud, yon reyalizasyon ki fè li pi solid finansyèman epi pare pou envesti nan pwojè enpòtan.

Nan domèn sante, Carl François sipèvize ouvèti Sant Lopital Inivèsite Nòdwès la, yon estrikti modèn ki satisfè bezwen popilasyon nan rejyon sa a. An menm tan, li lanse travay pou reyabilite Lopital OFATMA nan Site Militè, yon aksyon ki amelyore aksè ak kalite swen sante pou moun ki afilye yo.

Anba direksyon Doktè Carl François, OFATMA vini yon enstitisyon modèn epi efikas. Rezilta sa yo montre kijan bon lidèchip ka chanje estrikti piblik yo ann Ayiti epi pote benefis reyèl pou plizyè milye sitwayen.