1ye desanm 2024, Jounen Mondyal Kont SIDA selebre atravè lemond, se yon okazyon pou montre sipò pou moun ki viv ak VIH, e pou rann omaj a plis pase 42 milyon moun ki pèdi lavi yo akòz maladi a.
Tèm jounen sa a, “Suivons le chemin des droits”, envite tout moun pou yo soutni dwa moun ki afekte pa VIH, pandan y ap kontinye batay kont stigmatizasyon ak diskriminasyon. Li raple nou ke menas VIH la toujou egziste epi li kontinye afekte anpil kominote nan tout mond lan.
Nan peyi Hayti, gen anviwon 150,000 moun ki viv ak VIH, e majorite yo ap suiv tretman antirretroviral. Malgre pwogrè sa yo, peyi a ap fè fas ak anpil defi nan kontwòl epi prevansyon maladi a. Stigmatizasyon kont moun ki gen VIH rete yon gwo baryè, sa ki fè ke anpil moun nan peyi a toujou ap ezite pou yo chèche swen medikal oswa menm teste pou VIH.
Sa a kreye yon sitiyasyon kote enfeksyon an ka kontinye gaye san kontwòl.Dapre estimasyon Nasyonzini ak ONU/SIDA, to prevalans VIH an Hayti varye ant 1.6% ak 1.7%, yon chif ki fè peyi a rete nan priyorite mondyal pou batay kont maladi a.
Gouvènman an, ansanm ak òganizasyon entènasyonal, dwe mete plis efò nan edikasyon ak aksè a tretman nan zòn ki pi vilnerab yo.
Objektif se elimine VIH kòm yon menas pou sante piblik an 2030, men sa mande plis angajman ak resous.Jounen sa a se yon apèl pou aksyon, pou plis moun kapab jwenn aksè a tretman, epi pou n kontinye travay kolektivman pou kraze stigmatizasyon ak diskriminasyon.
Li se yon moman pou sonje ke batay kont VIH se yon dwa pou tout moun, e se ansanm nou kapab swiv chemen sa a pou ofri yon avni pi byen pou jenerasyon kap vini yo.
Discover more from Hayti Kiskeya Nouvèl
Subscribe to get the latest posts sent to your email.