Yon nouvo gwoup 200 polisye kényan rive Hayti jedi sa a, nan Ayewopò Entènasyonal Toussaint Louverture, pou vin ranfòse operasyon sekirite kont gang ame k ap simen laterè atravè kapital la ak lòt rejyon yo.
Se nan kad Misyon miltinasyonal sipò pou sekirite ke Kenya ap dirije, polisye sa yo vini pou bay Polis Nasyonal la sipò nan batay kont ensekirite a ki t ap depase kapasite fòs lokal yo. Yo pral deplwaye rapidman nan zòn ki pi cho yo, tankou Cité Soleil, Martissant, Delmas, ak lòt katye kote gang yo ap fè lalwa.
Otorite ayisyen yo espere ke ranfò sa a ap bay yon souf nouvo pou pèp la ki viktim kidnaping, asasina, ak zak vyolans chak jou. « Se yon etap enpòtan pou montre ke nou pa pral kite peyi a tonbe nèt anba men kriminèl yo, » dapre sa yon ofisyèl sekirite deklare.
Men, opinyon divize sou prezans polisye etranje sa yo. Gen moun ki wè sa tankou yon espwa pou retabli lapè, pandan gen lòt ki pè ke sa pa chanje anyen, menm jan ak lòt entèvansyon entènasyonal ki pa t bay rezilta solid nan tan pase.
Pandan mizè ak laperèz ap kontinye gaye sou tout peyi a, anpil moun ap tann pou wè si kolaborasyon sa a ap vrèman ede retabli sekirite ak diyite pèp ayisyen an.
Discover more from Hayti Kiskeya Nouvèl
Subscribe to get the latest posts sent to your email.